Прекрасно е чувството да се искачиш на врвот на планината Винсон на Антарктикот, пред сè, заради самиот себе, но уште повеќе кога со тоа ќе предизвикаш гордост кај целата своја нација, изјави денеска на прес-конференција планинарката Илина Арсова.
Арсова е првата Македонка која ги искачи сите седум највисоки планински врвови во светот. Илина на 27 декември минатата година успеа да го искачи врвот Винсон -4892 м, проект на Федерацијата за планинарство на Северна Македонија и Агенцијата за млади и спорт и со тоа го комплетираше проектот „Седумте врвови“.
Со искачувањето на овој врв, Илина стана првата Македонка која успеа да ги искачи сите седум највисоки врвови на седумте континенти и ја вброи државава со свој женски претставник во светскиот планинарски предизвик наречен „7 summits“.
Планината Винсон на Јужниот Пол е екстремно студена, но при искачувањето на тимот, заедно со Илина имале одлични услови, ладно, но без ветер.
„Посебно беше чувството кога пред завршување на седмиот врв и моето пристигнување во Скопје на аеродромот, освен најблиските, ме пречекаа и група планинари, мои пријатели, колеги на чело со професорот Угриновски, кој воедно е и првиот Македонец што стапнал на поларната површина на Антарктикот во 2002 година. Се чувствував посебно. Сите тие луѓе на свој начин ме мотивираа да истраам до завршувањето на оваа мисија. Кога правам паралела со други спортови, сакам да кажам дека ова е спорт кој е сплет на повеќе спортови. Треба да се знае да се ракува со опрема, да се познава првата помош, да се знае да се приспособи на екстремни услови за живот. Ова е натпревар кој трае со денови и месеци. Изложени сме на многу ризици и тоа е главниот предизвик. Треба да знаеш да му излезеш на чаламот од каршија“, изјави Арсова.
Најниска температура на врвот било од -35 до -40, додека во шаторите – 18, откако се работело за експедиција од 4 лица со еден водич.
Ана Манасиева од Агенцијата за млади и спорт изтази поддршка за Арсова
„Горди сме на Илина и понатаму ќе ја поддржуваме. Се надевам дека Овој успех ќе биде дополнителна мотивација за многу жени и девојчиња“, смета Манасиева.
Следниот предизвик за Илина е на буквата П, но не откри за која земја се работи.
И.Р.