Копретседателот на „Демократска Бугарија“ Атанас Атанасов го опиша како посебна иронија вчерашниот коментар на Слави Трифонов дека во замена за ветото на Бугарија за прием на Северна Македонија во Европската унија, треба да се одобри безвизното патување во САД и Шенген зоната за Бугарите. Атанасов за бугарската „Нова ТВ“ изјави дека поништувањето на визите од САД е ирелевантно и не треба да се става на овој начин, но не гледа ништо лошо во изјавата на Трифонов.
-Членството на Северна Македонија во ЕУ е важно прашање за Бугарија. Мораме сериозно да го сфатиме ова прашање и да ги заштитиме нашите национални интереси. Да ги спроведеме договорите, рече Атанасов, потенцирајќи дека „Демократска Бугарија“ не ја поддржува идејата на Трифонов.
Лидерот на „Има таков народ“ вчера сподели на Фејсбук дека темата Северна Македонија е важна за сите Бугари, затоа што тоа е дел од нивната национална историја и „затоа што над 200 илјади бугарски војници загинаа за слободата и обединувањето на оваа земја“.
-Бидејќи Американците толку многу сакаат Северна Македонија да е во Европската Унија, на граѓаните на Бугарија, како и на граѓаните на повеќето земји во Европската Унија, да не им требаат визи за да одат во Америка. И второ, повторно, бидејќи сме полноправна членка на Европската Унија, Бугарија мора веднаш да стане членка на Шенген зоната. По чекање и чекање и ние треба да бидеме Европејци. Сега сме помалку Европејци од вистински Европејци, напиша Трифонов.