Атлантскиот совет утре ќе објави извештај за можната американска стратегија за Западен Балкан, јави Глас на Америка на македонски јазик.
Според потпретседател на Атлантскиот совет во Вашингтон, Дејмон Вилсон „сега е вистинско време за обновен американски ангажман на Западен Балкан“.
– Во нашето истражување порачуваме дека е време САД повторно да покажат јасна визија дека Западен Балкан ќе биде дел од трансатлантската заедница. Тоа е наша визија, стратегија и партнерство со Европската унија. Второ, постои одредена област во која САД имаат изразена улога, а тоа е безбедноста. Третиот елемент е политичката динамика, и последно, Западен Балкан мора да биде интегриран во ЕУ, кога се во прашање сообраќајот и енергетиката, посочи Вилсон.
Како што јави Глас на Америка на македонски јазик, Вилсон истакна дека ако САД останат неодлучни, ќе се создадат услови за погрешна ситуација, како што се случи со Македонија во 2008-та година, кога државата не успеа да влезе во НАТО на Самитот во Букурешт.
– Да утврдиме специфичен начин на кој САД можат да помогнат, а тоа е силен дипломатски пат, со цел Приштина и Белград да можат да дојдат до заклучок, како и да се утврди пат за поврзување на Атина и Скопје, смета Вилсон, нагласувајќи дека тоа може да се постигне со меѓусебна заложба на американската дипломатија и Европската унија.
Тој нагласува дека конференцијата во Вашингтон, која Атлантскиот совет ја организира в среда, ќе биде можност лидерите од Западен Балкан да се сретнат со високи претставници на Стејт департментот.
– Тоа покажува дека постои политички апетит и интерес, и со поддршка од Американскиот конгрес и заедно со Европската унија, да обезбедиме трајно присуство и ангажман, потенцира Вилсон.