Американскиот претседател Џо Бајден по средбата со германската канцеларка Ангела Меркел изјави дека двете земји нема да отстапуваат од демократските принципи и универзалните човекови права, спротивно на потезите на Кина.
„Германија и Соединетите држави заеднички ќе се спротивстават на руската агресија“, рече Бајден, пренесува од Гласот на Америка.
На почетокот на своето обраќање, американскиот претседател изрази сочувство за последиците од поплавите во кои загинаа и исчезнаа десетици луѓе во Германија и неколку европски земји.
Бајден рече дека ја пренел својата загриженост до германскиот канцелар заради изградбата на гасоводот „Северен поток 2“.
„Добрите пријатели не мора да се согласуваат за сè“, рече американскиот претседател.
Соединетите држави тврдат дека проектот ја загрозува европската енергетска безбедност, бидејќи тоа подразбира потпирање на континентот кон руски гас, што може да му овозможи на Кремљ да изврши притисок врз одредени земји во Источна и Централна Европа.
Ангела Меркел посочи дека двете земји се за слободни демократски општества, зборувајќи за германскиот и американскиот став кон Кина.
“Начините на кои се справуваме со Кина се засноваат на вредностите што ги споделуваме со САД. Ние споделуваме меѓусебно разбирање дека Кина е наш конкурент”, рече Меркел.
Во врска со проектот за гасоводот „Северен поток 2“, канцеларката Меркел рече дека тоа е тема на која двете страни, како што рече, имале различни проценки.
“Нашите ставови се разликуваат. Германија ја смета Украина за транзитна земја”, рече германскиот канцелар.
Таа исто така посочи дека успешната борба против пандемијата „ковид-19“ значи најголем можен број на вакцинирани граѓани во обете земји.
Германија, додаде таа, е исклучително задоволна од враќањето на Соединетите држави во Парискиот климатски договор.
Пристигнувањето на Ангела Меркел во Вашингтон се смета за нејзина последна посета на Америка за време на нејзиниот 16-годишен мандат како канцелар, бидејќи наскоро ќе и истече мандатот.
Планот за престој на германската канцеларка во САД вклучува вечера со претседателското и потпретседателското семејство во Белата куќа.