Кандидатот на демократите за претседател на Соединетите Американски Држави, Џо Бајден, изјави дека нормализацијата на односите на Косово со Израел е позитивен чекор, пренесува „Лајми“.
Запрашан за договорот со посредство на Трамп, за време на прес-конференција во петокот, кандидатот на Демократската партија за претседател на САД одби да коментира нешто за што не ги знае сите детали, но рече дека нормализацијата со Израел е позитивна.
„Сметам дека нормализацијата на односите меѓу земјите е генерално добра работа. Да се има земја со мнозинство муслиманско население што ги нормализира односите со Израел, во општа смисла, има позитивно влијание врз мене“, рече Бајден.
Откако во Белата куќа беше потпишан договорот за економска нормализација меѓу Косово и Србија, претседателот на Соединетите Американски Држави, Доналд Трамп изјави дека Косово и Израел се согласиле за нормализирање на односите и за воспоставување дипломатски односи.
Договорот го потпишаа косовскиот премиер Авдулах Хоти и српскиот претседател Александар Вучиќ во Овалната соба во присуство на Трамп.