Американскиот претседател Џо Бајден ги предводеше Американците во понеделникот во комеморацијата на смртните случаи во пандемијата на коронавирус, кога земјата го преминува тажниот праг од 500.000 смртни случаи од Ковид-19 и ги повика Американците да ги заборават разликите и заедно да се борат против пандемијата.
– Денес одбележуваме навистина мрачна пресвртница што ги крши срцата – 500.071 мртви. Повеќе Американци починаа во оваа пандемија за една година отколку заедно во Првата светска војна, Втората светска војна и Виетнамската војна, рече Бајден.
Бајден, потпретседателката Камала Харис, првата дама Џил и вториот г-дин Даг Емхоф одржаа едноминутно молчење пред Белата куќа по обраќањето на претседателот, стоејќи опкружени со бројни запалени бели свеќи, пренесува „Хина“.
– Како нација, не можеме да прифатиме таква сурова судбина. Иако толку долго се боревме против оваа пандемија, мора да се спротивставиме да не се вкочаниме од тага и да не гледаме на изгубениите животи како на статистика – рече Бајден во емотивното обраќање во Белата куќа.
Секоја личност која починала од коронавирус имала семејство, пријатели и „извонреден живот“ кој пребрзо завршил, истакна Бајден.