Белгија и Чешка повикаа на нови санкции на ЕУ за да се спротивстават на руското влијание на претстојните избори за Европскиот парламент, откако неколку земји открија мешање, се вели во отвореното писмо до лидерите на ЕУ. Писмото од 16 април го потпишаа белгискиот премиер Александар де Кро и чешкиот претседател Петер Фиала, а беше упатено до лидерите на Европската комисија, Европскиот совет и Европскиот парламент.
Двајцата лидери тврдат дека проруски дезинформации и мешање веќе се евидентирани во неколку земји-членки. Белгиските безбедносни служби открија мрежа во Белгија, со трансфери на пари, што делумно се одвиваше во Чешка. Целта на мрежата беше да се воспостави соработка меѓу проруските политичари во Европскиот парламент, да се помогне да се изберат повеќе проруски кандидати и да се назначат „луѓе активни во оваа мрежа како вработени во (новоизбраните) членови на парламентот.
Де Кро рече дека европските лидери на самитот се договориле да го воведат кризниот механизам, кој беше активиран за време на пандемијата на коронавирус, за два месеци. Специјална единица потоа внимателно ќе ги следи дезинформациите.
„Планот е да се направи редовен извештај за состојбата на дезинформациите. Ќе ги поврземе овие информации, ќе ги споделиме со земјите-членки и ќе соработуваме со националните судски власти за да дејствуваме“, рече Де Кро на прес-конференција.
Белгија го истакна особениот ризик не само за европските институции, туку и за НАТО алијансата, чие седиште е блиску до нејзиниот главен град, Брисел. Изборите за Европскиот парламент се одржуваат од 6 до 9 јуни.
Белгија, заедно со другите земји-членки, отвори кривична истрага, а Чешка воведе санкции против неколку физички и правно лице за напорите да се поткопа територијалниот интегритет на Украина.
„Времето е вистинско да се воспостави нов режим на рестриктивни мерки за спротивставување на штетните руски активности“, напишаа лидерите.