Реал Мадрид претрпе тежок пораз од Арсенал во првиот натпревар од четвртфиналето на Лигата на шампионите на УЕФА. Тие ќе имаат шанса да го надополнат изгубеното на реваншот на „Сантијаго Бернабеу“, но следната недела ќе мора да анулираат негатива од три гола. Мисијата не е невозможна, но е на долната граница на веројатност.
„Топџиите“ прикажаа маестрален настап на овој меч. Без вистински напаѓач, тие успеаја да исфрлат еден од најдобрите тимови во светот и да направат голем чекор кон нивното прво полуфинале во Лигата на шампионите од 2009 година. Арсенал сè уште е во потрага по својот прв трофеј во ЛШ во историјата, а убедливата победа над „кралскиот клуб“ им носи огромна доза на самодоверба што може да ги носи кон таа цел.
Џуд Белингем беше видно потресен по мечот, а во разговор со новинарите ги сподели впечатоците од натпреварот, како и им честиташе на противниците за маестралниот настап.
„Имаа добар план за натпреварот. Направија одлична работа со анализирањето на нашата игра, како ќе ја нападнеме топката. Тоа им овозможи да преземаат многу повеќе ризици, особено кога топката беше на страна. Секоја чест за нив, одиграа одлично. И без да се погледнат слободните удари, кои ретко се постигнуваат, имаа многу шанси кои можеа да ги искористат и дополнително да не казнат… Имавме среќа што примивме само три гола“, истакна 21-годишниот фудбалер.
Реал одигра добро прво полувреме, но во второто не личеше на себе. Примија три гола во еден период од играта, што е втор пат во последните три натпревари.
„Шокирани не е вистинскиот збор, повеќе сме разочарани од себе. Нема оправдувања, мора да се погледнеме во огледало. Вакво нешто се случува цела сезона, само на многу повисоко ниво. Ќе ни треба нешто посебно за да ја свртиме оваа ситуација. За среќа, овие работи можат да се случат во фудбалот, а ако има едно место каде може да се случи, тоа е на нашиот стадион“, порача Белингем.
Англискиот репрезентативец сепак верува во пресврт. Свесен е дека Мадрид се тие кои знаат да се извлечат од вакви ситуации и се надева дека среќата повторно ќе биде на нивна страна.
„Мораме да бидеме скромни, искрени и да се надеваме на подобар настап на следниот натпревар. Историјата докажа дека се е можно. Постигнавме многу голови на натпреварите, во нашиот речник нема збор за предавање. На наш терен ќе мора да имаме многу подобра реакција отколку на овој натпревар ако сакаме да се надеваме на победа”, заклучи играчот од средниот ред на Реал.
Реваншот е закажан за среда на 16 април, а големата битка во Мадрид ќе започне во 21 часот.