Последните изјави на Христијан Мицкоски се најјасен доказ за неговата паника пред 19 октомври. Кога политички лидер ја губи смиреноста и измислува имагинарни сценарија за коалиции што не постојат, тоа значи само едно: тој знае дека поразот и неуспехот да се реализираат антиалбанските планови му тропаат на вратата. Вистината е едноставна: неговиот проект наречен ВЛЕН е во слободен пад и на 19 октомври ќе претрпи вистински дебакл. Наместо да зборува за визија и програма, Мицкоски се занимава со фикции и се обидува да измислува сценарија за самиот да избере албански претставници, обвинија денеска од ДУИ преку прес-конференција.
Членката на партијата, Арта Биљали-Зендели упати неколку прашања до премиерот Христијан Мицкоски.
– Зошто на Мицкоски толку многу му пречи ДУИ? Дали е тоа затоа што знае дека не може да ја потчини ДУИ и да ја претвори во вазал? Зошто СДСМ нема кандидати таму каде што ВМРО-ДПМНЕ исто така не предложи, како на пример во Чаир, Тетово, Гостивар и Струга? Не е ли ова доказ дека ВМРО и СДСМ спроведуваат заеднички план за политичка асимилација на Албанците и продолжување на деградирачкиот проект со вазалите на ВЛЕН? Зошто се појави толку загрижен во Собранието кога рече дека планот на ДУИ е „да не им се дозволи на Македонците да избираат кој ќе ги води албанските општини“?
Реалноста е следнава: Мицкоски сфати дека ДУИ не може да се елиминира. Бидејќи ДУИ не е само партија – таа е политичка организација на Албанците, темел на еднаквоста и архитект на најголемите достигнувања на оваа земја: Охридскиот договор, членството во НАТО, преговорите со ЕУ, јазичните и институционалните права, порача екс-пратеничката.
На 19 октомври, додаваат од ДУИ, Албанците ќе го дадат најсилниот одговор.
-Ние не исчезнуваме, не се предаваме и не сме продадени. А уште помалку се купува албанското достоинство. Нашиот глас е посилен од која било фикција, а на 19 октомври, овој глас ќе се чуе како никогаш досега. ДУИ е тука и ќе остане единствената политичка опција на Албанците, рече Биљали Зендели.