Втор ден, тим на Бугарската национална телевизија претстојува во Македонија во обид да утврди дали имало напад врз два бугарски споменици и воени гробишта. Во репортажата од терен, нивниот новинар Николај Минков вели дека на ова подрачје не сретнале никаде гробишта на кои биле погребани бугарски партизани од првата светска војна, ниту дека имало сквернавење како што деновиве изјави бугарскиот претседател Румен Радев.
Во репортажата говорат и двајца граѓани од Кавадарци, Ацо Темков и Петар Камчев, инаку поранешен директор на Историскиот музеј кој 37 години работел во оваа установа.
И двајцата зборуваат дека никогаш не виделе гробишта на оваа локација или да чуле за нешто такво од постари граѓани, туку дека тука има два споменика кои се наоѓаат на далечина еден од друг на километар и половина од кои едниот е во спомен на 193 загинати бугарски војници во периодот, како што стои на плочата на споменикот, 1915-1918 година а другиот е исто така во чест на бугарски војници.
Вчера бугарското Министерство за надворешни работи, соопшти дека нивната земја води политика за пребарување и обнова на бугарските воени гробишта и споменици во Република Северна Македонија.
-Во најголем дел, тие се во многу тешка ситуација како резултат на конзистентната политика на дебугаризација што се водеше во минатото на територијата на денешна Република Северна Македонија.
Ние постојано апелиравме за помош до властите во Скопје, кои знаат дека ова е едно од болните прашања за Бугарија. Повиците до властите во Република Северна Македонија за помош во потрагата, реставрацијата и заштитата на бугарските воени гробишта беа упатени во едногласно усвоената Декларација на 10 -ти октомври 2019 година на 44 -то Народно собрание.
Затоа информациите за уништување на две бугарски воени гробници на територијата на Република Северна Македонија, доставени до нас од Фондацијата Македонија, се земаат многу сериозно и Министерството за надворешни работи на Република Бугарија активно работи на разјаснување фактите и преземе соодветни мерки. Почитувањето на споменот на жртвите е универзално прашање и пристапот до него е знак за степенот на перцепција на европските вредности, потенцираат од тамошното МНР.
Фото: BNTNEWS.BG