Македонија се најде на листата на земји за кои САД воведуваат нови реципрочни тарифи, според најновата одлука на американскиот претседател Доналд Трамп. Со оваа мерка, за македонските производи ќе се применува царина од 33%. Одлуката беше објавена на настан во Белата куќа, каде Трамп ја претстави својата стратегија за заштита на американската економија, истакнувајќи дека трговските дефицити веќе не се само економски проблем, туку „национална вонредна состојба“.Според официјалните податоци, трговската размена меѓу Македонија и САД во 2024 година изнесувала нешто над 314 милиони долари, што е пад од 2,1% во однос на 2023 година. Најголем дел од македонскиот извоз во САД вклучува тутун, облека, железо и челик, додека од Америка најмногу се увезуваат електрични машини и опрема.
За причините и последиците од мерките кои и ги воведе САД на Македонија, „Локално“ побара став од претседателот на политичката партија „Македонски Концепт“ д-р Петар Богојески, кој смета дека прашањето за царинските бариери со САД не треба да се гледа низ призмата на политичките ривалства, туку како предизвик што бара решенија во интерес на државата. Според него, приоритет треба да биде изнаоѓање солуции кои ќе овозможат унапредување на трговските односи и подобрување на економските услови за македонските и американските компании.
„Ова прашање не треба да се гледа низ призма на политички ривалства, туку како предизвик што бара решенија во интерес на државата. Потребен е системски пристап во надворешната политика, со фокус на економската дипломатија. Македонија мора да иницира дијалог со американската администрација за корекција на царинските бариери, со оглед на фактот што ние имаме симболичен суфицит во трговската размена со САД, а тие на тоа возвратија со 33% тарифи, потенцирајќи ги можностите за заемно корисна економска соработка“ смета Богојески.
Богојески истакна дека секоја средба на високо ниво е значајна за Македонија и дека државата треба да ја искористи секоја можност за зајакнување на своите меѓународни позиции. Тој нагласи дека јакнењето на економската дипломатија е клучно за подобрување на билатералните односи и привлекување нови можности за соработка со САД.
„Секоја средба на високо ниво е важна за Македонија и треба да се искористи максимално за подобрување на нашите меѓународни позиции. Секако дека резултатите од овие посети мора да бидат конкретни. Како држава, треба да работиме на постојано присуство во Вашингтон, преку зајакнување на дипломатската мрежа и формирање специјална економска работна група за унапредување на трговските односи,“ вели Богојески.
Претседателот на „Македонски концепт“ смета дека Македонија мора внимателно да управува со своите ресурси, особено во меѓународните односи, со цел да ги подобри економските политики и да намали трговските бариери. Според него, земјава треба да настапи со јасна економска стратегија која ќе овозможи одржлив развој и ќе ги зајакне трговските односи со најважните меѓународни партнери.
„Македонија мора внимателно да управува со своите ресурси, особено во меѓународните односи. Високите царини се резултат на економски политики што може да се подобрат преку поинтензивна комуникација со стратешките партнери. Решението е во градење економска агенда што ќе го подобри нашето место на меѓународниот пазар, а не само во реактивно прилагодување на условите што ни се наметнуваат,“ изјави Богојески.
Богојески смета дека Македонија мора да настапи со заедничка стратегија во надворешната политика, без разлика на партиската припадност, со цел унапредување на економските односи со САД. Тој потсети дека „Македонски концепт“ веќе поднесе иницијатива за визна либерализација, што го смета за прв чекор кон поцврсти економски врски со САД. Според него, ова прашање мора да биде приоритет во македонската надворешна политика, со цел да се создадат подобри услови за трговија и инвестиции.
„Најважно е да настапиме со заедничка стратегија, без разлика на партиската припадност. Владата треба да ја зајакне економската дипломатија преку формирање тим кој ќе работи на олеснување на трговските односи со САД, намалување на царините и привлекување инвестиции. Македонски Концепт веќе даде иницијатива за визна либерализација, што е прв чекор кон поцврсти економски односи. Ова мора да биде приоритет во нашата надворешна политика,“ завршува Богојески.
Д.Ѓ