Шефот на европската дипломатија, Жозеп Борел, вечерва во Брисел изјави дека ЕУ го поздравува усвојувањето на Декларацијата на претседателот Александар Вучиќ и премиерот Албин Курти за исчезнатите лица и оти очекува двете страни да постигнат опиплив напредок во решавањето на случаите на исчезнати лица и исполнување на обврските кон семејствата.
Постигнатиот напредок редовно ќе го оценува Заедничкиот комитет за следење, со кој претседава ЕУ, одговорен за следење на спроведувањето на Договорот за патот кон нормализација на односите меѓу Косово и Србија и неговиот анекс за спроведување, се вели во писмената изјава на Борел.
Борел изјави дека со усвојувањето на Декларацијата, Вучиќ и Курти ја потврдиле важноста за решавање на судбината на преостанатите исчезнати лица, го препознале проблемот како хуманитарен и ја истакнале итната потреба од дополнителни заеднички напори за ублажување на состојбата на погодените семејства и поширока заедница.
„Од 6.065 случаи на исчезнувања меѓу 1 јануари 1998 година и 31 декември 2000 година, 1.621 остануваат нерешени. По повеќе од 20 години, нивните семејства сè уште живеат во тага, не знаејќи каде се нивните најблиски. Семејствата имаат право да ја знаат судбината на нивните роднини, како и на општеството во целина“, напиша Борел.
Тој додаде дека решавањето на прашањето за исчезнатите не е само хуманитарна обврска, туку и „клучен фактор за помирување и доверба меѓу луѓето“.
„Стана итно да се обезбеди што е можно поскоро завршување на процесот на идентификување на местото на погреб. Спомените избледуваат, а поединците, местата и настаните се потешко да се истражат“, рече високиот претставник на ЕУ за надворешна и безбедносна политика.
Вучиќ и Курти вечерва ја усвоија Декларацијата за исчезнати лица, на средба со Борел, специјалниот претставник на ЕУ за дијалог Мирослав Лајчак и главните преговарачи на Белград и Приштина, Петар Петковиќ и Бесник Бисљими, како дел од бриселскиот дијалог.
Со Декларацијата, Вучиќ и Курти се обврзуваат, меѓу другото, тесно да соработуваат за идентификација на погребните места и следење на ископувањата, да обезбедат целосен пристап до информациите, вклучително и оние означени како доверливи, кои помагаат да се лоцираат и идентификуваат преостанатите исчезнати лица и да се стави на располагање целата релевантна документација за утврдување на судбината на останатите исчезнати лица.