Вчера Европската унија воспостави нов режим на санкции, со кој ќе се воведат рестриктивни мерки за сите одговорни за сериозно кршење на човековите права во Русија, како и за загрозување на демократијата и владеењето на правото.
Како што е објавено на веб-страницата на Советот на ЕУ, одлуката за воспоставување нов режим на санкции „е дел од одговорот на ЕУ на забрзаната и систематска репресија во Русија“.
Се додава дека високиот претставник на ЕУ за надворешна политика и безбедност, Жозеп Борел предложил ЕУ да воспостави нов режим на санкции како одговор на смртта на опозицискиот лидер Алексеј Навални во февруари и сериозното кршење на човековите права во Русија.
Новата рамка вклучува забрана за продажба или извоз во Русија на опрема што може да се користи за внатрешна репресија, вклучувајќи одредени огнени оружја, муниција и бодликава жица, како и технологија или софтвер дизајниран за следење или пресретнување на телекомуникациите.
Новиот режим на санкции се применува и на 19 лица, вклучително и 13 судии кои се сметаат за одговорни за кршење на човековите права и еден ентитет – руската Федерална казнено-поправна служба.
„Федералната поправна служба е позната по широко распространетата и систематска злоупотреба и малтретирање на политичките затвореници во Русија и е одговорна за казнената колонија каде што беше затворен Навални“, соопштиле од Советот на ЕУ.
Именуваните лица се предмет на замрзнување на имотот, а на граѓаните и компаниите на ЕУ им е забрането да им даваат средства на располагање, објавиле од Советот на ЕУ. Лицата од списокот за санкции исто така подлежат и на забрана за патувања.