Високиот функционер на Европската унија за надворешна политика и безбедност, Жозеп Борел оцени дека продолжувањето на дијалогот меѓу Белград и Приштина е важен момент за него и за ЕУ и додаде дека тоа е еден од неговите главни приоритети, објави Европската служба за надворешно дејствување.
Коментирајќи го состанокот во четвртокот во Брисел, на кој претседателот на Србија, Александар Вушиќ и премиерот на Косово, Авдулах Хоти, се состанаа под покровителство на ЕУ, Борел рече дека тоа е важен момент, пишува Н1.
„Тоа беше важен момент за мене и Европската унија. Дијалогот, кој ЕУ започна да го олеснува во 2011 година, е во суштината на она што сакаме да го направиме на Западен Балкан“, рече Борел, додавајќи дека тоа е еден од неговите главни приоритети.
Борел им се заблагодари на германската канцеларка Ангела Меркел и францускиот претседател Емануел Макрон за нивната порака за поддршка за дијалогот меѓу Белград и Приштина со организирање состанок во Париз.
Осврнувајќи се на состанокот, Борел рече дека не се разговарало за лесни теми.
„Целото попладне и дел од вечерта ги поминавме во интензивни разговори со двајца партнери. Ова не беа лесни дискусии. Темите беа исчезнати лица, раселени лица и тие се многу чувствителни прашања и се основни делови (во процесот) на помирување. Разговаравме и за економска соработка, што за мене претставува идна врска меѓу Косово и Србија. Тие припаѓаат на истата област и патуваат до истата дестинација – Европа“, рече тој.
Во иднина, нивните луѓе, капитал и добра треба да се движат слободно, тие исто така треба да работат заедно за развој на економијата и инфраструктурата, рече Борел, додавајќи дека тоа е заемно корисно и дека ЕУ вложи многу напори во креирањето рамка за таква соработка.
„Нашата работа со претседателот Вучиќ и премиерот Хоти само што започна. Мораме да постигнеме многу заедно за доброто на Србија, Косово и Европската унија. Го почитувам фактот дека тие ги изнесоа своите ставови чесно и конструктивно во четвртокот, дури и додека имаше несогласувања“, рече Борел.
Тој додаде дека е „импресиониран“ од фактот дека тие се подготвени и желни да продолжат со работата.
„Побаравме од нив да го испратат својот тим следната недела, за да не губиме време. И ќе се сретнеме со претседателот Вучиќ и со премиерот Хоти во септември. Со нетрпение очекувам да работам со нив и се радувам што можеме да сметаме на долго дипломатско искуство на специјалниот претставник на ЕУ Мирослав Лајчак на оваа сложена задача“, рече Борел.