Пензионираниот генерал кој ја предводеше командата на Здружените сили на Обединетото Кралство, Ричард Баронс, предупреди дека Украина може да се соочи со пораз од Русија во 2024 година.
Во интервју за Би-Би-Си, тој рече дека постои „сериозен ризик“ Украина да ја загуби војната оваа година, бидејќи може да „чувствува дека не може да победи“, јави Танјуг.
„И кога станува збор за таа точка, зошто луѓето би сакале да продолжат да се борат и да умираат, само за да го одбранат неодбранливото?“
Баронс истакна дека Украина сè уште не е во таа фаза, но нејзините сили се критично слабо со муниција, војници и противвоздушна одбрана.
Украина има очаен недостиг од муниција
Како што истакна, многу најавуваната контраофанзива на Украина минатата година не успеа да ги избрка Русите од територијата што ја окупираа, па сега Москва се подготвува за летна офанзива.
„Обликот на руската офанзива што ќе следи е сосема јасен. Гледаме како Русија напаѓа на првите линии, користејќи предност пет на еден во артилерија, муниција и вишок човечка сила засилена со употреба на ново оружје“, нагласи Баронс.
Тој додаде дека Украина сега има „очаен“ недостиг од муниција, делумно поради политичките расправии во западните земји.
„Во одреден момент ова лето очекуваме да видиме голема руска офанзива, со обид за пробивање на украинските позиции. И ако тоа се случи, ризикуваме руските трупи потоа да се преселат во областите на Украина каде што украинските воени сили не можат да ги спречат“, предупреди Баронс.
Експертите со кои разговараше Би-Би-Си ги наведуваат трите најверојатни, според нивното мислење, насоки на напад од страна на Руската Федерација – Харков, Донбас и Запорожје.
Во исто време, стратешката цел на Русија оваа година можеби нема да биде ни територијална, според експертите.
Харков примамлива мета за Москва
Џек Ватлинг, виш научен соработник за копнена војна во тинк-тенкот Вајтхол, нагласи дека минатата година руските сили точно знаеле каде може да нападне Украина – од правец на Запорожје на југ кон Азовското Море, и соодветно планирале и успешно го спречиле однапред .
„Проблемот за вооружените сили на Украина е што Русите можат да го изберат правецот на нивниот главен напад, а Украина ќе биде принудена да ја брани целата линија на фронтот, што, се разбира, не може да го направи“, истакна Баронс.
Тој смета дека Харков, како втор град во Украина, кој е опасно блиску до руската граница, е примамлива цел за Москва.
„Харков е секако ранлив…Украина не е во состојба да обезбеди доволно воздушна одбрана за да ја одбрани смртоносната мешавина од беспилотни летала, крстаречки и балистички ракети насочени во нејзина насока“, вели Ватлинг.
Аналитичарите проценуваат дека Украина ќе може да продолжи да функционира како одржлив ентитет доколку Харков падне, но тоа би било „катастрофален удар и за моралот и за економијата“.