Бројот на смртни случаи поврзани со коронавирусот ширум светот надмина четири милиони, пишува Ројтерс, кој во својот извештај наведува дека многу земји имаат потешкотии со набавка на доволни количини вакцини за да ја имунизираат нивната популација.
Иако бројот на нови инфекции и смртни случаи е намален во земји како што се САД и Велика Британија, неколку земји се соочуваат со недостиг на вакцини, бидејќи делта видот на коронавирусот станува сè подоминантна низ целиот свет.
Помина повеќе од една година пред бројот на смртни случаи од Ковид-19 да достигне бројка од два милиони, а следните два милиони беа регистрирани за само 166 дена, според анализата на Ројтерс.
Петте земји со најголем број на смртни случаи од Ковид се САД, Бразил, Индија, Русија и Мексико, кои сочинуваат околу 50 проценти од сите смртни случаи во светот.
Во исто време, Перу, Унгарија, Босна и Херцеговина, Чешка и Гибралтар имаат највисока стапка на смртност во однос на големината на населението.
Земјите од Латинска Америка се соочуваат со најлошите последици од епидемијата уште од март годинава, бидејќи во тој регион се пријавени 43 од секои 100 инфекции во светот, според анализата на Ројтерс.
Болниците во Боливија, Чиле и Уругвај обично имаат пациенти инфицирани со Ковид-19 на возраст од 25 до 40 години, откако продолжува трендот на инфицирање на млади пациенти.
Во бразилскиот град Сао Паоло, дури 80 проценти од пациентите на одделот за интензивна нега се пациенти заразени со Ковид-19.
Зголемувањето на смртноста, исто така, го оптоварува капацитетот на крематориумите во земјите во развој, а гробарите во неколку земји се принудени да ги прошират гробиштата.
Индија и Бразил се земјите кои пријавуваат најголем број смртни случаи на дневна основа во просек од една недела, а според анализата на Ројтерс, Индија претставува секој трет смртен случај регистриран во светот секој ден.
Многу здравствени експерти, сепак, сметаат дека официјалниот број на загинати е потценет на глобално ниво, а Светската здравствена организација (СЗО) минатиот месец процени дека бројот на загинати е многу поголем.
Минатата недела, индиската држава Бихар драстично го зголеми бројот на жртви по откривањето на илјадници непријавени случаи, што предизвика загриженост дека вкупниот број на смртни случаи во Индија е значително поголем од официјалните податоци.
Додека посиромашните нации се борат да го вакцинираат своето население поради недостиг на вакцини, од побогатите земји се бара да донираат поголеми количини.
„Примарното прашање во Северна и Јужна Америка е пристап до вакцини, а не прифаќање на вакцини“, рече во средата директорката на Панамериканската здравствена организација, Кариса Етјен, повикувајќи ги земјите донатори да испраќаат вакцини што е можно побрзо.
Група од седум најразвиени земји во светот (Г7) ветија дека ќе обезбедат една милијарда вакцини против Ковид-19 за да им помогнат на сиромашните земји да го вакцинираат своето население.