Членот на бугарската партија ВМРО БНД, која не успеа да влезе во Собранието, Александар Сиди, смета дека претседателот Румен Радев треба да мисли на Македонија, а не за тоа чиј е Крим.
За време на телевизиската дебата пред вториот круг од претседателските избори минатата недела, Радев го нарече Крим руски, по што следеше негативна реакција и во Бугарија и во странство.
-Бугарските политичари треба да имаат храброст и да го бранат својот став за Македонија. Наместо да објаснуваат чиј е Крим, треба да му кажат на претседателот чија е Македонија. Мене тоа ми е многу поважно. За Бугарија прашањето чија е Македонија е важно, тоа се случува со Бугарите во западните периферии, напиша Сиди на Фејсбук.
Тој додаде дека ниту Русија ниту САД се загрижени за судбината на етничките Бугари кои живеат во Македонија.
-Тие се загрижени само за сопствените политички интереси, рече политичарот.
Тој ги коментираше и повиците на американските конгресмени Бугарија да даде зелено светло за почеток на преговорите за влез на Северна Македонија во ЕУ.
-Да бевме нормална земја, г-ѓа Мустафа (Херо Мустафа, амбасадорка на САД во Софија) ќе беше повикана во МНР на Бугарија и ќе ѝ беше врачена протестна нота. Во дипломатијата постои поим за реципроцитет, истакнува Сиди.