Чешкиот претседател Петр Павел праша колку би вределе изборите во Украина кога окупаторска војска окупира една петтина од територијата и му порача на американскиот претседател Доналд Трамп дека да се нарече украинскиот претседател Володимир Зеленски диктатор на земја која е секојдневно бомбардирана три години, бара навистина голема доза на цинизам.
„Каква вредност би имале изборите во земја која три години се брани од агресија на соседна нуклеарна сила? Како може да се организираат избори кога една петтина од територијата е окупирана од окупаторска војска и цела држава секојдневно се бомбардира? Да се нарече претседателот на таква земја диктатор бара голема доза цинизам“, објавил чешкиот претседател на мрежата „Х“.
Чешкиот премиер Петр Фијала, кој преку видео врска учествуваше на вториот состанок на европските лидери организиран од францускиот претседател Емануел Макрон за прашањето за Украина и напорите на американскиот претседател Трамп за почеток на мировните преговори, по средбата изјави дека Трамп дефинитивно погрешил.
„Не можеме да се согласиме. Доналд Трамп греши за тоа“, рекол Фијала, осврнувајќи се на изјавата на Трамп дека претседателот Зеленски е диктатор и дека официјален Киев е виновен за руската агресија врз Украина и дека војната не требаше да започне, туку можеше да ја заврши за три години.
„Да не дозволиме да бидеме испровоцирани од одредени изјави на социјалните мрежи. Целта на сите западни земји треба да биде траен, одржлив и праведен мир во Украина“, изјави Фијала за чешката јавна телевизија „ČT“.
Чешкиот премиер додал дека овие последни изјави на американскиот претседател потврдуваат дека Европа мора да ја зајакне својата позиција.
„Сите се согласуваме дека Европа треба да биде посилна. Треба да ставиме пари и оружје на маса и тогаш светот ќе не сфати сериозно. Европа долго време го запоставуваше ова и сега е време тоа да се промени“, навел Фијала.