Претседателот на Социјалистичката партија на Србија, Ивица Дачиќ, изјави дека сите што се поврзани со таа партија, и ги поддржуваат или учествуваат во демонстрациите што се одржуваат изминативе денови, ќе сносат одговорност, ќе бидат отстранети и протерани од СПС, затоа што „насилството и штети на Србија“.
Дачиќ изјави дека тоа ќе се примени „без оглед дали станува збор за партиски или државни функционери и нивни соработници или локални организации“.
„Како што е познато, СПС и јас лично остро ги осудивме хаосот, инцидентите и насилството пред Националното собрание од првата вечер. Тоа нема никаква врска со епидемиолошката состојба, туку тоа е обид насилно да се собори владата… Бидејќи нападите врз Вучиќ и СНС се дел од намерна стратегија, и надвор и внатре во земјата, да се дестабилизира Србија“, се вели во писмената изјава Дачиќ.
Тој, исто така, оцени дека „обидот да се оддели СПС од Вучиќ и СНС е составен дел на таа стратегија.
„Додека јас сум на чело на партијата, Социјалистичката партија на Србија ќе биде со Вучиќ во интерес на Србија. Затоа, надвор и внатре во земјата и партијата, започнати се механизми за мое соборување. Од ставовите на Европската социјалистичка партија дека СПС може да влезе во таа организација само ако е против Вучиќ, затоа што има членови на сегашните и поранешни демократи, до организирање напади и барања за мое отстранување. Сето тоа е дел од истата кујна за дестабилизација на Србија“, оцени Дачиќ.