Министерот за внатрешни работи на Србија, Ивица Дачиќ беше хоспитализиран вчера поради пневмонија и неговата состојба е оценета како многу сериозна.
Дачиќ беше хоспитализиран на Клиниката за пулмологија на Клиничкиот центар на Србија поради тешка пневмонија и е на респиратор.
Заменик-директорот за пулмологија Спасоје Попевиќ денес изјави дека неговата здравствена состојба останува сериозна, но дека ситуацијата е постабилна отколку во средата навечер.
„Тој е сè уште во сериозна здравствена состојба. Борбата продолжува, тој е на механичка вентилација и во овој момент успеавме да ја стабилизираме неговата состојба“, рече Попевиќ.
Додаде дека е прерано да се даваат какви било прогнози.
Српскиот претседател Александар Вучиќ утрово, на пат кон Казахстан, објави дека го посетил министерот за внатрешни работи и дека неговата здравствена состојба е нешто подобра. Вучиќ го објави ова од авион, пренесува РТС.
„Го посетив Ивица утрово. Лекарите велат дека неговата состојба е нешто подобра. Верувам во него, а сега насоката е Казахстан за одлични резултати за нашата Србија“, сподели Вучиќ на својот Инстаграм профил.
Тој додаде дека закрепнувањето на Дачиќ е во тек, но дека претпазливост е сè уште неопходна.
„Секако, претпазливост е сè уште неопходна и ништо не е сигурно, но е подобро, на радост на неговото семејство и на сите луѓе што го сакаат“, рече Вучиќ.