СОЈАТА е позната како многу здрава храна и содржи голем број на соединенија познати како изофлавони, кои можат да го оптимизираат производството на хормони и да ги намалат симптомите поврзани со менопаузата. Што е со нејзината консумација за време на бременоста?
Првото нешто што треба да се има на ум е дека речиси секој ден се создава нов производ од соја, особено оној со висока содржина на протеини и наменет за вегани. Сепак, квалитетот на протеините не е толку висок како во храната од животинско потекло. На сојата дури и недостасуваат неколку есенцијални амино киселини.
Една од причините против консумирањето на соја за време на бременоста е присуството на „антинутриенти“ во храната. Тоа е серија на елементи кои ја намалуваат биорасположивоста на одредени есенцијални минерали, како што се калциум, железо или цинк. Недостатокот на овие хранливи материи може негативно да влијае на фетусот, како што е наведено во студијата објавена во списанието Nutrients.
Згора на тоа, сојата често се одгледува со употреба на многу пестициди, со цел да се намали ризикот од штетници. Овие супстанции се многу растворливи во масти (се лепат до мастите) и можат да стигнат до плодот преку плацентата. Затоа, кога е непознато потеклото на сојата, најдобро е да се избегнува. Но, кога доаѓа од органски насади, не треба да ги содржи споменатите отрови.
Значи, дали е безбедно да се консумира соја за време на бременоста?
И покрај горенаведеното, нема цврсти докази кои сугерираат дека внесот на соја може да биде штетен за здравјето на трудниците и фетусот. Ова е точно се додека се консумира умерено и како дел од здрава, разновидна и урамнотежена исхрана.
Бидете внимателни со преработените производи од соја бидејќи многу од нив се неквалитетни и содржат адитиви, едноставни шеќери и транс масти. Ваквата храна не мора да има директно штетно влијание врз фетусот или врз здравјето на жената, но подобро е да се намали нивниот внес на минимум.
На долг рок, тие можат да имаат негативно влијание врз функционирањето на метаболизмот и на воспалителните маркери во телото, што се претвора во зголемен ризик од болести. Затоа овој вид на храна треба да се намали во исхраната на трудниците, но и на општата популација. Исхраната секогаш треба да се заснова на свежа и нутритивно богата храна.
Клучот за добра исхрана е разновидноста и енергетската рамнотежа, па затоа консумирањето производи кои содржат голема количина на антинутриенти би можело да има спротивен ефект. За време на бременоста, избегнувањето на дефицитот на важни елементи е од суштинско значење за одржување на доброто здравје на мајката и идното дете.
Конечно, ако се сомневате која храна може или не може да се вклучи во вашата исхрана доколку сте бремени, секогаш е најдобрата опција да се консултирате со експерт.