Северна Македонија мора да разбере дека патот кон Европа и добрососедските односи минува преку дела, а не преку зборови.
Ова го изјави министерот за внатрешни работи на Бугарија, Иван Демерџиев по повод проблемите долж границата за бугарските граѓани да учествуваат на прославата на годишнината од раѓањето на Гоце Делчев.
„Неколку бугарски државјани имаа потешкотии да ја преминат границата, вклучително и полициските сили на кои им беше одобрено да ме придружуваат на оваа посета над 40 минути. Истиот ден презедовме акција со Министерството за надворешни работи. Побарав објаснување за тоа зошто и кои се причините и како прва причина што ни ја наведоа е немањето струја. Дадов јасни индиции дека за секој друг проблем од техничка природа, бидејќи тврдеа дека се такви, ќе им помогнеме да ги надминат. Имам барање на крајот на неделата повторно да се сретнеме, најверојатно тоа ќе биде во Делчево, не во Скопје. Ние одржуваме комуникација, но навистина сакам македонската страна да разбере дека патот кон добрососедските односи и патот кон Европа минуваат низ дела, а не зборови. Делата мора да одговараат на зборовите“, посочи Демерџиев, цитиран од БНР.