Шефот на грчката дипломатија Никос Дендиас и заменикот министер за надворешни работи надлежен за економска дипломатија Костас Франкојанис во вторник, на 26 ноември, ќе го посетат Скопје.
Портпаролот на Министерството за надворешни работи на Грција, Александрос Гениматас рече дека агендата на разговори се уште се комплетира, но со оглед на тоа дека и Франкојанис ќе биде во Скопје заедно со Дендиас, ќе стане збор и за економската соработка.
„Една од темите за кои ќе се разговара е и дополнителен развој на нашите економски односи, затоа ќе биде присутен и господинот Франкојанис. Мислам дека желба на двете страни е соработката да се движи во позитивна насока, рече Гениматас.
Шефовите на дипломатиите на Грција и на Северна Македонија се сретнаа вчера во Брисел, средба за која Гениматас рече дека била конструктивна и станало збор за подготовките за посетата на Дендиас на Скопје.
„Во рамките на грчката стратегија за Западен Балкан, грчката влада има намера да преземе конкретни иницијативи за поддршка на европската перспектива на земјите од регионот, со цел консолидација на безбедноста, зајакнување на стабилноста и развој на просперитетот на поширокиот регион“, рече портпаролот на грчкото МНР.
Гениматас спомена дека се планира, во февруари следната година да се одржи квадрилатерална средба на која ќе присуствуваат министрите за надворешни работи на Северна Македонија, Албанија, Бугарија и домаќинот Грција, а на почетокот на следната година и организирање Самит на земјите членки на ЕУ со државите од Западен Балкан 5+1, односно, Северна Македонија, Албанија, Србија, Црна Гора, Босна и Херцеговина и Косово.
Во рамките на грчката иницијатива е и посетата на Дендиас на Скопје во вторник, по која ќе следува и посета на Тирана. Министерот за надворешни работи на Грција упатил и покана до неговите колеги од Северна Македонија и Албанија да присуствуваат на работниот појадок на шефовите на дипломатиите на 9 декември во Брисел.