Хрватски Динамо на македонските репрезентативци Стефан Ристовски и Аријан Адеми го победи Милан со 2:1 во последното коло од првата фаза од Лигата на шампионите во Загреб, но сепак не успеа да се пласира во нокаут фазата од елитната фаза. Динамо поведе во 19. минута со голот на Мартин Батурина, кој ја искористи големата грешка на противничкиот дефанзивец Матео Габија.
Батурина му ја „украде“ топката и се упати кон Мајк Маињан погодувајќи низ неговите нозе за 1:0. Нови проблеми за Милан стигнаа во 39. минута кога Мусах го повлече Лука Стојковиќ на работ од шеснаесетникот и заработи втор жолт картон, со што и исклучување.
Динамо постигна втор гол во 50. минута, но голот на Стојковиќ беше поништен бидејќи Батурина играше со рака на почетокот на акцијата. За жал, три минути подоцна Кристијан Пулишиќ постигна гол за 1:1. Популарните „Модри“ уште еднаш погодија во 56. минута, но голот на Куленовиќ беше поништен поради офсајд. Сепак, во 60. минута Марко Пјаца постигна одличен гол за 2:1.
Македонските интернационалци Аријан Адеми и Стефан Ристовски беа дел од натпреварот.
На Динамо му беше потребна победа против Милан во последното коло, но требаше да се поклопат уште неколку резултати за хрватскиот шампион да се пласира меѓу 24-те најдобри екипи. За жал, тимот од Загреб остана прв од екипите кои паднаа под линијата.
Да потсетиме, Динамо својот настап во новото издание на Лигата на шампионите го отвори со дебакл во Минхен, губејќи од Баерн со 2:9. По тој меч, Сергеј Јакировиќ доби отказ, а тимот го презеде Ненад Бјелица. Следеше реми на домашен терен против Монако (2-2), па гостински победи во Салцбург (2-0) и Слован против Слован (4-1). Во петтото коло Динамо загуби од Борусија Дортмунд во Загреб (0:3), а потоа ремизираше на Максимир против Селтик (0:0).
Следуваше нова промена на кормилото на „Модрите“- на крајот на годината Бјелица доби отказ, а нов тренер стана прославениот Италијанец Фабио Канаваро. Тој дебитираше во Лигата на шампионите со поразот од 0:3 во Лондон од Арсенал.