Италијанскиот премиер Марио Драги изјави денес дека ЕУ мора да излезе посилна од историските предизвици предизвикани од војната во Украина, вклучително и со проширување кон исток, пренесе АФП.
Конфликтот, рече тој пред Европскиот парламент во Стразбур, е „заедничко безбедносна, хуманитарна, енергетска и економска криза“, што откри дека постојните институции на ЕУ биле „несоодветни“ во нивниот одговор. Одговорот, тврди тој, е „прагматичен федерализам“ со рационализирано донесување одлуки што ќе ги отстрани ветото на земјите-членки, што честопати може да ги блокира мнозинските позиции.
„Ова е почеток на патот што ќе доведе до ревизија на договорот. И ако е така, ние мора да го прифатиме“, рече тој, со аплауз од европратениците. Драги, поранешен претседател на Европската централна банка, на кого се припишува спасувањето на еврото од колапс пред една деценија, рече дека проширувањето на ЕУ на исток е клучно, вклучително и преку пристапувањето на Украина.
„Треба целосно да ги интегрираме земјите кои имаат европски аспирации“, рече тој.
Тој ја изрази поддршката на Италија за „итно отворање на пристапните преговори“ со Албанија и С. Македонија, како и интензивирани разговори со Косово и БиХ.
„Ние ги поддржуваме сите овие земји да се приклучат на Европската унија и исто така сакаме Украина да стане членка“, рече тој.