Во последните месеци, здравствениот систем во Северна Македонија доживеа трагични настани кои длабоко го шокираа јавното мислење. Необјаснивата загуба на животи на бебиња на Клиниката за детски болести е јасен аларм за тешката состојба во која се наоѓа нашето здравје, обвинуваат денеска од Демократската унија за интеграција (ДУИ).
„Понатаму, вознемирувачки е да се забележи намерна тенденција за маргинализирање и замена на албанскиот медицински персонал со македонски персонал, како што е неодамнешниот случај во Здравствениот дом во Куманово. Овие акции не само што ја нарушуваат внатрешната кохезија на здравствените установи, туку и го нарушуваат квалитетот на услугите што им се нудат на нашите граѓани“, потенцираат од партијата на Али Ахмети.
Во меѓувреме, додаваат од ДУИ, министерот за здравство се чини повеќе се занимава со туристички патувања во Дубаи и партиски активности, занемарувајќи ги обврските кон граѓаните.
„Овој недостаток на посветеност и одговорност е неприфатлив, особено кога здравјето и животот на нашите деца се во прашање.
Дополнително, јасно е дека нелегитимниот министер за здравство, кој се однесува како марионета на ВМРО-ДПМНЕ и е натопен во корупција, покажува и високо ниво на неспособност во управувањето со здравството. Оваа комбинација на сервилност, корупција и неспособност доведува до длабока криза, каде што нашите граѓани плаќаат највисока цена.
Граѓаните бараат министерот за здравство веднаш да поднесе оставка и да ја преземе одговорноста за овие сериозни пропусти. Исто така, повикуваме на независна и транспарентна истрага за неодамнешните смртни случаи на Клиниката за детски болести и итна забрана за дискриминација на албанскиот медицински персонал“, наведуваат од ДУИ.
Време е, додаваат оттаму, интересите на граѓаните и здравјето на нашите деца да ги ставиме над личните амбиции и политички агенди.
-Нема да молчиме пред оваа неправда и ќе продолжиме да се бориме за здравствен систем кој им служи на сите граѓани, без разлика, стои во партиското соопштение.