Демократската унија за интеграција остро реагираше на изјавите на вицепремиерот и кандидат за градоначалник, Изет Меџити за време на посетата на едно семејство во Гази Баба.
„Меџити уште еднаш покажа синоќа дека лагите и манипулациите немаат граници за него“, изјави Решат Ахмети на прес-конференцијата на ДУИ.
„Тврдеше дека двојно повеќе Албанци биле вработени во една година од владата на ВАЛЕН отколку во целиот период на владата на ДУИ. Таквата лага заслужува да биде запишана во Гинисовата книга на рекорди“, додава тој.
Ахмети нагласи дека вистината е сосема поинаква и дека кога Меџити зборува за вработување, тој ги има предвид само своите роднини и најблиски луѓе.
„Додека илјадници граѓани на Чаир и Скопje со години чекаат фер можност, неговиот клан собира по две или повеќе плати“, рече Ахмети. Тој јавно го предизвика Меџити да именува само две имиња на граѓани од Чаир кои биле вработени во изминатата година и кои не се ниту членови на неговото семејство ниту блиски пријатели. Само две имиња, ништо повеќе“, нагласи членот на ДУИ.
Ахмети, исто така, потсети на список од десетици имиња поврзани со, како што вели, непотизмот на Меџити, од неговиот братучед Бурим Латифи, директор на МЕПСО, до брачниот пар Имери, кои, како што рече, се само дел од мрежата на блиски луѓе што Меџити ги вработува и промовира.
„Овој список е само мал дел од она што граѓаните на Чаир и на Скопје многу добро го знаат, дека за Изет Меџити, политиката отсекогаш била средство за организирање на семејството и пријателите, а не за служење на граѓаните“, нагласи Ахмети.