„Демократската унија за интеграција и граѓаните се шокирани од бруталните и секојдневни лаги на поразените на изборите и слугите на ВМРО-ДПМНЕ, на чело со Изет Меџити, за официјалниот албански јазик и обидот на Уставниот суд да го укине. Во секое медиумско претставување бесрамно кажуваат лаги и во секоја постапка прават грешка“, велат од ДУИ преку соопштение како реакција на вчерашната изјава на вицепремиерот Изет Меџити во однос на Законот за јазиците.
„За толку кратко време на власт, Изет и ВЛЕН продолжуваат да уништуваат се што е постигнато за Албанците. Изет вчера побара отчет од ДУИ зошто сме го прифатиле Законот за јазиците таков каков што е?! Изет го знае одговорот, бидејќи тој самиот ја предводеше преговарачката група од ДУИ со СДСМ и го презентираше Законот пред претседателството на партијата, дури и во значително послаба форма од законот што беше одобрен во 2019 година. Истиот закон, Таравари тврди дека тој го изнесе, во многу јавни изјави, иако не отвори уста во Владата кога се изгласа законот“, стои во реакцијата на ДУИ, додавајќи дека „Албанците се понижуваат и омаловажуваат од слугите на ВМРО ДПМНЕ и 30 години подоцна се враќаат со своите права како граѓани од втор ред“.
Меџити смета дека ДУИ мора да објасни зошто донела Закон за јазици кој не е во согласност со Уставот и зошто нивниот претходен владин партнер СДСМ го испратил законот до Венецијанската комисија. Меџити вчера истакна дека Уставниот суд треба да го процени политичкиот момент за да не се создаде дестабилизација.
Според вицепремиерот, претходната владеачка коалиција меѓу ДУИ-СДСМ го испратила законот до Венецијанската комисија.
Тој додаде дека ДУИ се обидува да го злоупотреби законот за албанскиот јазик за да создаде дестабилизација. Министерот е дециден дека ВЛЕН гарантира дека „нема да дозволат играње со албанскиот јазик“.