„Уште од самиот почеток на овој судски процес знаевме дека ќе има ваква брутална казна, немаше изготвено вештачење, а денеска судот се повикуваше на докази, за кои навистина не ми е јасно на кои докази се повикува“, изјави адвокатот на обвинетиот Бојан Јовановски, Сашко Дуковски.
Тој додаде дека борбата за правда нема да заврши овде.
„Ова е една голема конструкција каде има голема помош од извршителот кој влага и излага од притвор кога сака. Се употребуваат двојни аршини“, изјави Дуковски.
На денешната пресуда за случајот „Рекет“, Јовановски доби затвор од 9 години за делата примање награда за противзаконито влијание и за перење пари, а Јанева 7 години за злоупотреба на службената положба и овластување. Пресудата е првостепена и осудените имаат право на жалба до повисокиот суд – Апелација.