Поранешниот шеф на Формула 1, Берни Еклстоун (91) гостуваше на радио „Тајмс“, каде што ги шокираше сите со своите контроверзни изјави во кои со цело срце го бранеше својот голем пријател, рускиот претседател Владимир Путин.
Целиот свет остро ја осуди руската агресија врз Украина, но има и такви кои ги бранат потезите на рускиот претседател Владимир Путин. Еден од нив е поранешниот прв човек на Формула 1. Пријателството меѓу Еклстоун и рускиот претседател не е тајна, но сите беа шокирани од изјавата на Еклстоун откако Русија ја изврши агресијата врз Украина.
Поранешниот сопственик на „најбрзиот циркус на светот“ не се двоумеше да го одбрани Путин, нагласувајќи дека рускиот претседател останал доследен на она што претходно го најавил.
„Како личност го сметам за многу директен и чесен. Владимир Путин го направи токму тоа што рече дека ќе го направи без никаква дискусија“, започна Еклстоун, зборувајќи во корист на рускиот претседател.
По таа изјава, новинарите кои го водеа интервјуто го потсетија Еклстоун дека Путин негирал дека сака инвазија на Украина, а на крајот тоа го направил.
„Но, понекогаш околностите се менуваат, нели?“, ладно одговори Берни.
Исто така, од перспектива на Еклстоун, неоправдано е откажувањето на трката во Формула 1 за Големата награда на Русија во Сочи.
„Претпоставувам дека зависи од луѓето вклучени во настанот да одлучат. Како може некој да процени што се случува денес? Можеби има луѓе кои мислат дека Русија ја направи вистинската работа“, се запраша Берни.
Инаку Берни Еклстоун е познат по тоа што признава дека верува во диктатурата како идеален политички систем и со години уверува дека Путин ќе биде голем лидер во Европа.
Токму Еклстон и Путин беа „архитектите“ на трката во Формула 1, која дојде во Русија во 2014 година. Берни долго време ја истакна својата желба да ја донесе Формула 1 на уличната патека во близина на Кремљ и Црвениот плоштад во Москва, во стилот на Монако. На крајот, тој одлучи да замине во Сочи, каде во 2014 година се одржа првата од осумте последователни трки за Големата награда на Русија.
Еклстоун на чело на Формула 1 беше 40 години, пред да се пензионира во 2017 година. Неговото богатство се проценува на 3,2 милијарди долари.