Силни ветришта се очекуваат во Грција следниве денови, со налети до 9 Бофоровата скала (односно, и до 100 километри на час), соопшти Националната метеоролошка служба (EMY) во временската прогноза денеска.
Северните ветрови во Егејското Море и на истокот на Грција ќе се засилат значително денеска и така ќе биде барем до недела, што ќе го зголеми ризикот од шумски пожари.
Според експертите, се предвидуваат силни ветрови над источното грчко копно, во централниот и јужниот дел на Егејското Море, како и на Крит.
Најтешкиот ден се очекува да биде утре, смета Министерството за климатска криза и цивилна заштита – со зголемен ризик од шумски пожари и потенцијални проблеми за бродскиот транспорт.
В сабота се очекува брзината на ветерот да достигне 7 до 8 на скалата Бофор, додека в недела локално ветровите ќе достигнат до 7 Бофори.
Температурите во Западна Грција постепено ќе растат, достигнувајќи од 38 до 39°C за време на викендот, а локално и до 40°C.
Во источните делови на земјата, поради северните Етезиски ветрови – познати во Грција како „Мелтеми“ – кои вообичаено дуваат над Егејското Море во текот на летото, температурите ќе останат пониски, не надминувајќи 35 до 37°С.