Автомобилската индустрија е во опасност и во САД и во Европа, предупреди денеска претседателот на групата Stellantis, Џон Елкан, наведувајќи ги зголемените тарифи и „нереалниот план за намалување на емисиите на стакленички гасови“.
„Со мрачните тарифи и престрогите регулативи, американската и европската автомобилска индустрија се изложени на ризик, додека Кина е на другата страна“, предупреди Џон Елкан, отворајќи го годишниот генерален состанок на 15 брендови на производителот на автомобили, вклучувајќи ги Peugeot, Fiat, Opel и Chrysler.
Во САД, автомобилската индустрија е тешко погодена од високите тарифи наметнати на увезените автомобили, но и од дополнителните тарифи, особено за алуминиум, челик и резервни делови, рече Елкан, кој ја предводеше групата откако извршниот директор Карлос Таварес беше соборен во декември 2024 година.
Тие тарифи од 25 отсто, кои беа воведени пред две недели, го оптоваруваат увозот на автомобили и автоделови во САД, особено оние што ги произведува Stellantis од Мексико и Канада.
„Во Европа, регулативите за емисиите на јаглерод наметнаа нереален патоказ кон целосна електрификација, надвор од допир со пазарната реалност“, додаде тој.
Тој рече дека некои влади во Европа нагло ги укинаа стимулациите за купување електрични автомобили, дека инфраструктурата за полнење е несоодветна и дека потрошувачите поради тоа се двоумат да се префрлат на електрични возила.
Европските и американските производители, исто така, се соочуваат со зголемена конкуренција од Кина, која би можела да продаде повеќе возила оваа година отколку САД и Европа заедно.
„Неуспехот на САД и Европа би бил трагедија, бидејќи производството на автомобили е извор на работни места, иновации и силни заедници“, рече Елкан.
Тој посочи дека не е доцна „ако САД и Европа преземат итни и неопходни мерки“ за промовирање на координирана транзиција кон електрични возила.
Џон Елкан, наследник на семејството што го основаше Fiat, исто така рече дека е охрабрен од зборовите на Доналд Трамп, кој вчера рече дека е отворен за компромиси за царините.