„Нема да има резултат од мисијата на Владо Бучковски во Софија и тој тешко дека има такви амбиции, бидејќи ова поглавје за преговорите со ЕУ е затворено оваа година“, изјавил новинарот, политичар и дипломат Велизар Енчев за посетата на Владо Бучковски на Софија.
Според Енчев, посетата на специјалниот претставник на С. Македонија е корисна по тоа што ќе се одржи „топол дипломатски однос меѓу Софија и Скопје“.
„По парламентарните избори, кои ќе се одржат во март, ако ГЕРБ веќе не владее, ниту една друга бугарска влада, без оглед кој ќе ја предводи, нема да дозволи да ја премине оваа црвена линија, која ГЕРБ сега не дозволува да се премине. Ние сме поставени покрај ѕид и нема каде да се повлечеме. Време е нашето МНР да се пофали дека за првпат од 1992 година има достојна позиција, целосно во согласност со историските факти “, вели дипломатот.
Тој истакнал дека на темата за С. Македонија, притисокот не е од Вашингтон, туку од Брисел, и со своето однесување лидерите во Бугарија покажале дека се плашат само од властите во САД, а не и од тие во ЕУ:
„Ако глобалниот фактор што нè притискаше беше Вашингтон, а не Брисел, ќе отстапевме досега“, смета Енчев.
Според него, „македонското прашање“ меѓу двете светски војни се должи на несоодветната, милитаристичка германска политика:
„Германија, како мотор на ЕУ, сака да го заврши претседателството со Советот на ЕУ со овој успех на Балканот. Дури и да се договоривме да започнат преговорите со С. Македонија и Албанија за членство во ЕУ, ова не би ги сменило проблемите меѓу нашите две земји. Јас го објаснувам тоа само со болната амбиција на Германија“, заклучил Енчев.