Турскиот претседател Реџеп Таип Ердоган го повтори своето ветување дека уништените куќи ќе бидат обновени во рок од една година за преживеаните од земјотресот.
Ердоган, кому во мај му претстојат неизвесни претседателски избори, денес ги посети регионите погодени од земјотресот и во градот Газиантеп изјави дека новите згради нема да имаат повеќе од три или четири ката.
Турскиот претседател, кој е под зголемени критики дека владата не одговорила адекватно на природната катастрофа, изјави дека владата работи на поставување привремени контејнери и засолништа за оние кои останале без покрив над главата.
Тој исто така рече дека вонредната состојба што ја прогласи претходно оваа недела, во 10 провинции погодени од земјотресот, ќе биде одобрена во парламентот подоцна денес. Владата најави дека вонредната состојба ќе го олесни управувањето со катастрофи во тие области.
За Ердоган, кој се соочува со тешка борба на претседателските избори во мај, природната катастрофа дојде во чувствителен момент, кога Турција се соочува со пад на економската активност и висока инфлација.