Шансите за мир во Газа по хуманитарната пауза се изгубени поради бескомпромисниот пристап на Израел, изјави турскиот претседател Реџеп Тајип Ердоган.
„Секогаш нагласувавме дека сме за траен мир, а не за хуманитарна пауза. Имаше шанса за мир и за жал ја загубивме поради бескомпромисниот однос на Израел“, ја пренесува оценката на Ердоган весникот „Гардијан“.
Ердоган во изјава за медиумите по враќањето од Дубаи, каде што учествуваше на меѓународната климатска конференција COP28, истакна дека сепак не губи надеж за постигнување траен мир, и оти Хамас не може да биде исклучен од потенцијалното решение. Повтори дека тој не го смета Хамс за терористичка организација.
„Мораме да се фокусираме на решение со две држави – формирање палестинска држава покрај Израел“, истакна Ердоган.
Седумдневниот прекин на огнот меѓу Израел и палестинското исламистичко движење Хамас во Појасот Газа заврши вчера, откако посредниците не успеаја да најдат формула за продолжување на примирјето и ослободување на повеќе заложници.
Израелските сили веднаш по прекинот на примирјето започнаа нова серија воздушни и артилериски напади врз јужниот дел на Појасот Газа.