Турскиот претседател Реџеп Таип Ердоган упати нови закани до Израел, велејќи дека Турција е подготвена да направи се за да ги заштити Палестинците.
За време на состанокот со членовите на регионалната организација на АКП во Ризе, Ердоган се осврна на ситуацијата во Газа и испрати предупредување до Тел Авив.
„Како што влеговме во Карабах и Либија, можеме да му го направиме истото на Израел. Нема ништо што не можеме да направиме, само треба да останеме силни“, рече турскиот претседател.
Ердоган во саботата во Ризе зборуваше за ситуацијата во Израел и Палестина, а ги критикуваше и САД.
„Подигнување на црвениот тепих за некој како Нетанјаху и аплаудирање на неговите лаги додека не им отечат рацете е голем недостаток на разум за Америка. Се срамиме во име на човештвото кога го гледаме тоа“, рече Ердоган.
Ердоган потоа додаде дека Турција испратила покана до лидерот на палестинските власти Махмуд Абас да дојде на седницата на Големото национално собрание на Турција, но дека тој не дошол.
„Кој вели дека не го поканивме? Жал ми е што не дојде. Прво треба да ни се извини. Го поканивме и не дојде. Чекаме да видиме дали ќе одговори во иднина “, рече претседателот на Турција.