Европската унија не може да каже кога би можела да биде готова заедничка изјава со САД, ниту кога очекува Белата куќа да издаде извршна наредба за царини за увоз на европски автомобили, соопшти денес Европската комисија.
„Ова е договор за кој веруваме дека е силен и најдобар што можевме да го имаме. Секако, очекуваме САД да преземат понатамошни чекори што се дел од овој договор, но не верувам дека можеме да поставиме временска рамка за овие ангажмани во оваа фаза“, изјави портпарол на Европската комисија, според Ројтерс.
Блумберг минатата недела објави дека Европската унија очекува американскиот претседател Доналд Трамп да објави извршни мерки што би го формализирале намалувањето на американските царини за увоз на автомобили од ЕУ, како и ослободувања од царини за одредени индустриски производи како што се делови за авиони.