Европската комесарка за проширување, Марта Кос денеска изјави дека Европската Унија (ЕУ) останува загрижена за владеењето на правото во земјите-кандидатки, иако има опиплив напредок во оваа област.
„Продолжува мешањето во судските постапки, притисокот врз службените лица кои истражуваат корупција и политизацијата на медиумските регулатори, што е неприфатливо“, изјави Кос пред новинарите на конференцијата на Советот за општи работи на ЕУ, по дискусијата на министрите од неколку земји-членки и земји-кандидатки за владеењето на правото во ЕУ.
Со Советот моментално претседава Данска, а нејзината министерка за европски прашања Мари Бјер изјави дека владеењето на правото во ЕУ во моментов е нејзина најважна вредност.
Бјер изјави дека за време на дискусијата, министрите разговарале за состојбата на владеењето на правото во земјите од Западен Балкан, со осврт на извештајот објавен на оваа тема од страна на Европската комисија (ЕК) во јули оваа година.
На дискусијата на Советот на ЕУ присуствуваа и министрите за европска интеграција на Србија, Албанија, Црна Гора и Македонија, кои не го коментираа исходот од разговорите, објави новинската агенција „Бета“.
Кос додаде дека членките на ЕУ се потпираат на владеењето на правото, кое вклучува независно судство, избори и медиуми, и дека земјите кои се стремат кон членство, но не можат да гарантираат одредено ниво на владеење на правото, не можат да се приклучат кон Унијата.
Таа, исто така, изјави дека земјите од Западен Балкан во моментов се „во центарот на процесот на проширување“ и дека владеењето на правото им гарантира слобода и сила во тој процес.
„Јасно е дека ако кандидатите не го почитуваат спроведувањето на владеењето на правото во своите земји, тие нема да можат да бидат членки на Унијата“, рече Кос.