Имиња на уште 24 криминалци се додадени на листата на најбарани лица во Европа, објави Европол.
„Овие луѓе имаат крв на рацете, предизвикаа или се обидоа да предизвикаат смрт на друго лице и можеа да се шетаат меѓу нас“, соопшти Европол и ги повика сите граѓани да го погледнат списокот на eumostwanted.eu и доколку имаат информации за бегалците, да ги пријават кај властите што е можно поскоро, преку интернет презентација или со јавување во полиција.
Секоја дојава е анонимна, соопшти Европол.
Во моментов на списокот има 57 лица, на кои Европол им порачува на граѓаните да не им приоѓаат, бидејќи се крајно опасни, туку да ги пријават.
Од 57-те моментално на тој список, тројца се хрватски државјани: Томислав Дрмиќ, кој Хрватска го бара за трговија со дрога и злосторничко здружување, Иван Шиметиќ, кој се бара за обид за убиство и Владимир Вацлавек, кој сега е додаден на листа за обид за убиство во 2001 година.
Двајца словенечки државјани кои се најдоа на листата на најбарани се Јанко Лавриќ по кого словенечката полиција трагаше од ноември минатата година за финансиска измама и Јоже Пирх кој сега е додаден на списокот и е на него за обид за убиство.
Словенечката полиција распишала и потрага по полскиот државјанин Даниел Томаш Панека, кој се бара за силување.
На листата на најбарани се наоѓа и црногорскиот државјанин Радоје Звицер, кој по барање на Австрија се бара за шверц на дрога и членство во криминална организација.
Страницата со листата на најбарани беше отворена во 2016 година, а Европол вели дека дала значителни резултати.
До денес се објавени профилите на вкупно 454 бегалци, од кои 164 се уапсени, а 53 апсења се случиле директно поради профилите објавени на платформата, соопшти Европол.