Европската агенција за лекови (ЕМА) денес соопшти дека, иако се испитуваат можните несакани ефекти на вакцината на „АстраЗенека“, останува при ставот дека придобивките од вакцината во спречувањето на ковид 19, со поврзан ризик од хоспитализација и смрт, се поголеми од ризикот од непожелни последици.
Во соопштението се наведува дека ЕМА продолжува со истрагата за извештаите за настаните поврзани со формирање на згрутчување на крвта кај луѓето кои примиле вакцина на „АстраЗенека“ против ковид 19.
„Ригорозна анализа на сите податоци поврзани со тромбоемболиски настани ќе се изврши во наредните денови. Експертите детално ги истражуваат сите расположиви податоци и клинички околности поврзани со одредени случаи со цел да утврдат дали вакцината можела да придонесе или е веројатно настанот да се случил поради други причини“, се вели во соопштението на ЕМА.
ЕМА додава дека во истрагата работи тесно со британско-шведската компанија, со експерти за крвни нарушувања и други здравствени власти, вклучувајќи ги и британските здравствени власти, заради нивното искуство со околу 11 милиони администрирани дози на оваа вакцина.
Наведено е дека ЕМА ќе разговара за досега собраните податоци во врска со истрагата и можните понатамошни чекори на состаноците на 16 и 18 март, пренесува „Танјуг“.
ЕМА ги повикува сите што ќе примат вакцина во меѓувреме и имаат какви било сомнежи, да контактираат со соодветен здравствен работник и да ги пријават сите несакани ефекти на националниот регулатор на лекови.
ЕМА додава дека настани како што се згрутчување на крвта се пријавени во многу мал број случаи по приемот на вакцината на „АстраЗенека“ и дека бројот на тромбоемболиски настани кај вакцинираните граѓани не се чини дека е поголем од бројот на вакви настани меѓу општата популација.