Пратеничката група на коалицијата Европски Фронт, предводена од ДУИ, ќе побара формирање на посебна Парламентарна Комисија за истражување на селективниот и едностран пристап на правосудниот систем, кој е, како што велат, под контрола на Владата, во третманот на трагедијата во Кочани.
Според ДУИ, оваа комисија треба да се формира веднаш и да вклучи претставници на ОБСЕ, како и претставници од амбасадите на САД. ЕУ и земјите-членки на Европската Унија во својство на набљудувачи, со цел да се обезбеди фер, независен и транспарентен истражен процес.
-Селективната правда ја потресе секој граѓанин на оваа земја и создаде без преседан ситуација која ги загрозува темелите на правната држава и довербата на граѓаните во институциите, велат од партијата од Мала Речица.
ДУИ реагира дека сопственикот на дискотеката Пулс од Кочани полицијата го водела без лисици, а со екс министерот за економија, Крешник Бектеши било обратно, го воделе со лисици на рацете. Велат дека гледаат со неверување на фактот дека нема вина кај актуелните директори на ДПИ, УЈП и Јавна безбедност и министрите за економија и внатрешни работи за пожарот во кочанската дискотека. Според опозициската партија, дури и студент на прва година од Правен факултет знае дека не постои причински последична врска низ годините, кога сите дозволи и лиценци се обновуваат секоја година. Од ДУИ велат дека „ова не е правда туку трансакција“.
Од СДСМ реагираа дека според член 117 од Законот за стечај, ако фирма има блокирана сметка повеќе од 45 дена и не исплаќа плати и придонеси подолг период, УЈП има законска обврска да поднесе барање за отворање стечајна постапка и да предложи мерки за обезбедување на имотот.
-Ако блокадата била заведена на 16 август 2024 година, тоа значи дека веќе до крајот на септември Управата требала да постапи, а клубот „Пулс“ требал да биде затворен. Но, клубот продолжил да работи. И 59 животи беа загубени, рекоа од опозициската партија преку соопштение.