ФИФА конечно ја објави својата одлука за заканата од неколку федерации да не играат на натпреварите против Русија во плејофот за Светското првенство во Катар.
Како што е познато, Полска, Шведска, Чешка, а подоцна и Британија веќе најавија дека нема да играат против руската фудбалска репрезентација додека не заврши војната против Украина.
„Сборнаја“ според програмата мора да се сретне прво со Полска во последните квалификации за СП следниот месец, а потоа и со некој меѓу Шведска и Чешка.
Во меѓувреме, имаше повици за повлекување на Русија од Светското првенство.
На крајот ФИФА ја објави својата одлука, која, сепак, е сосема соломонова и никако не го решава проблемот.
„Во однос на претстојните квалификации за Светското првенство, ФИФА ги забележа позициите искажани од полската, чешката и шведската федерација и во моментов водиме дијалог со нив. Ќе продолжиме да бараме решение прифатливо за сите. Нашите мисли остануваат со сите се погодени од оваа шокантна и вознемирувачка ситуација“, објави ФИФА.
Полскиот фудбалски сојуз побрза да одговори на оваа одлука со прилично остар твит: „Одлуката на ФИФА е целосно неприфатлива за нас. Во ситуација на војна во Украина, не сакаме да играме натпревари. Нашиот став останува непроменет. Полската репрезентација нема да излезе во плеј-офот против Русија, без разлика во кое име се натпреварува оваа репрезентација“.
Така, ФИФА е во многу деликатна ситуација доколку одбие да ја отстрани Русија од Мундијалот, а во исто време реши да ги казни Полска, Чешка и Шведска за нивниот бојкот. Тоа може дополнително да ја зголеми негативната перцепција кон фудбалската централа која и понатаму нема особено добро реноме.
Еве ги одлуките на ФИФА:
* Во Русија нема да се одржуваат фудбалски турнири, а домашните натпревари на локалните тимови ќе се одржуваат на неутрален терен.
* Екипите што ќе ја претставуваат Русија на меѓународната сцена ќе се натпреваруваат под името „Фудбалски сојуз на Русија“, а не „Русија“.
* Знамето и националната химна на Русија нема да се користат на натпреварите на кои учествува Фудбалскиот сојуз на Русија. Во меѓувреме, ФИФА ќе продолжи со својот дијалог со МОК, УЕФА и други спортски организации за да процени дали се потребни дополнителни мерки или санкции, вклучително и можно исклучување од турнирите. Оваа мерка може да биде изречена во иднина доколку ситуацијата не се промени брзо.