Лидерот на СДСМ, Венко Филипче вечерва од трибината организирана оо рамки на предизборната кампања порача дека овие избори се од исклучителна важност за иднината на граѓаните и за напредокот на државата. дека Гостивар знае дека силата е во заедништвото, а не во поделбите.
– Ова е моментот кога секој глас прави разлика. Затоа велам дека нема помалку важен глас. Ова не е време за молк, ова е време за исправување. Апстиненцијата не е казна за СДСМ — тоа е награда за ВМРО. Секој изгубен глас е добивка за режимот што повторно го чувствуваме. Овие денови да ги искористиме и да поразговараме со соседи, роднини, да го посетиме секое маало, да се мобилизираме и да повикаме на обединување. Сега не е време за откажување од борбата за нашиот дом. Ова е момент на враќање, на единство, на нов почеток, рече Филипче.
Порача дека Гостивар знае дека силата е во заедништвото, а не во поделбите и дека затоа Гостивар е симбол на соживотот, почитта и достоинството и дека токму оттука ќе почне обновата на вредностите, кои, како што посочи, се системски разорени.
Филипче остро ги критикуваше политиките на власта и обвини дека таа намерно го разединува народот за да ја скрие сопствената неспособност.
– Тие што денес владеат се обидуваат да нè разделат-со лаги, со поделби, со национализам што треба да ја прикрие нивната неспособност. Нивната политика е политика на поделби, на дестабилизација, на навреди. Политика која секогаш завршува со тензии во општеството, оцени Филипче.
Рече дека ВМРО-ДПМНЕ заборавила на најважната лекција од историјата – дека заедништвото е силата на оваа земја.
Посочи дека дупката во Буџетот се продлабочува, јавниот долг расте, а граѓаните стануваат се посиромашни.
– Реалноста е дека буџетот е во дупка од 1,4 милијарди евра, приходите заостануваат, а капиталните инвестиции се помалку од половина реализирани. Се задолжуваат без покритие, јавниот долг достигнува над 62 отсто од бруто домашниот производ, највисоко ниво во регионот, а странските инвестиции скоро и да ги нема. Ова е резултатот на лоши политики, на неспособност, незнаење и на небрежност. Немаат ниту план, ниту стратегија како да ја водат државата, истакна Филипче.
Додаде дека додека власта трупа нови долгови, народот тоне во сиромаштија, платите стагнираат, а нема ниту мерки за поддршка на граѓаните.
-Минималната плата и натаму е една од најниските во регионот, пензионерите добија помалку од ветеното – само 1.000 денари, студентите не го добија бараното зголемување од 130 денари за студентски оброк, ваучерите од 250 евра ги нема, а над 1.000 студенти останаа без студентски оброк. Земјоделците во Полог останаа без поддршка – субвенциите се намалени, откупните цени паднати, а трудот обезвреден, рече Филипче.
Посочи дека СДСМ секогаш била на страната на граѓаните со мерки за поддршка и во најголемите кризи со кои се соочувала државата.