Претседателот на СДСМ, Венко Филипче информира дека имал конструктивна средба со еврокомесарката за проширување, Марта Кос. Според него, СДСМ е целосно посветен на евроинтегративниот процес. Жали што, како што вели, изминатата година има стагнација на тој пат и отсуствува стратегија и политички дијалог.
Филипче побарал поддршка од Кос и од сите европски институции за откочување на европскиот пат на Македонија.
Запрашан што му порачала еврокомесарката, лидерот на СДСМ вели дека била „многу искрена“ и кажала дека „дава се од себе и ги користи своите капацитети и механизми за да продолжи евроинтегративниот пат, но дека има еден дел од задачата што треба ние тука дома да ја сработиме“.
-Овој процес исто како и во другите земји кои што станаа членки на Унијата како Хрватска и Словенија, најмногу зависи од внатрешниот консензус бидејќи е прашање за кое целото општество да се обедини, кажа Филипче пред новинарите.