Втор ден полициски час во Македонија. Во Скопје и градовите ширум државата може да се видат само празни улици и полициски патроли. На одредени места сепак се јавува за приведувања на граѓани, кои го прекршиле полицискиот час. Полицијата сопираше и автомобили за проверка.
Инаку Владата денеска донесе дополнителни ограничувања на движењето на граѓаните.
На 26-тата седница на Владата на Република Северна Македонија е донесена одлука за измени и дополнувања на одлуката за ограничување на движењето на граѓаните на целата територија во земјата.
Забраната за движење за сите граѓани од 21:00 до 06:00 часот, се заменува со ограничување на движењето од 21:00 до 05:00 часот заради гужвите што се создадоа во јавниот превоз и заради потребата на граѓаните да стигнат на работните места во утринските часови.
Дополнително, Владата донесе одлука да се забрани движењето на граѓаните над 67 години од 11:00 часот до 05:00 часот следниот ден.
Владата на вечерешната седница донесе уште една одлука за ограничување на движењето на младите до 18 години и за нив забраната за движење ќе започнува во 21:00 часот и ќе трае до 12:00 часот наредниот ден.
Фото: Борче Поповски