Анализата на порталот “Ландгеист” покажува дека Германија е најголем трговски партнер на Северна Македонија, како и на повеќето земји во Европа. Германија ја има најголемата економија во Европа и има силни трговски врски со над половина од европските земји.
Втората најсилна економска сила, Велика Британија, не е најголем трговски партнер на ниту една земја во Европа. Франција, трета по ред економска сила, е најзначаен трговски партнер на Шпанија и Германија. Италија, четврта со најголема економија, има значајни трговски врски со Албанија, Хрватска, Малта и Ватикан.
Иако САД и Кина имаат силни економски релации со Европа, тие се најзначајни трговски партнери само на многу мал број европски земји. Најголем трговски партнер на Велика Британија и Ирска се САД, додека Кина е најголем трговски партнер само на Русија. Русија е најзначаен трговски партнер на Турција и Белорусија, додека за Украина тоа е Полска.