Ќерката на Ким Јонг-ун, Ју-ае се школува дома и целото слободно време го поминува јавајќи коњи, скијајќи, пливајќи и очигледно уживајќи во луксузниот живот, иако нејзината земја се соочува со растечка криза со прехраната, пишува „Телеграф“.
Новите информации објавени оваа недела од страна на јужнокорејската разузнавачка служба нудат поглед на животот на девојчето кое, според некои севернокорејски експерти, нејзиниот татко Ким ја подготвува за еден ден да ја преземе земјата како негов наследник. Јужнокорејските власти не веруваат дека Ју-ае официјално е именувана за наследник, но нејзиното ненадејно влегување во јавниот живот во ноември и се почестите појавувања на голем број официјални настани се дел од пропагандна кампања која има за цел да покаже дека династијата Ким ќе владее во следната генерација.
Иако често ја фотографираат државните медиуми, всушност многу малку се знае за ќерката на Ким. Се претпоставува дека има околу 10 години, а оваа информација ја откри поранешниот кошаркар Денис Родман, кој ја запознал додека била уште бебе. Националната разузнавачка агенција на Јужна Кореја (НИС) соопшти дека девојчето има постар брат кој има 13 години и уште еден помлад брат или сестра.
Тие веруваат дека Ким е сè уште доволно млад и здрав за да именува наследник, наведува Ју Санг-бум, еден од политичарите кои присуствуваа на доверливиот состанок оваа недела. НИС, исто така, откри дека Ким Ју-ае никогаш не посетувала образовна институција, но се школува дома во Пјонгјанг, рече Ју. Тој го цитираше извештајот на НИС и рече дека нејзините хоби биле јавање коњи, скијање и пливање. Таа е особено добра во јавање коњи, додава, нешто на што нејзиниот татко Ким Јонг Ун е многу горд.
Нејзиниот бел коњ беше откриен во церемонијална коњаничка единица за време на големата воена парада минатиот месец, каде Ју-ае го зазеде централното место со нејзиниот татко и мајка Ри Сол-ју, мавтајќи од ВИП балконот. Симболиката на белиот коњ одамна е вкоренета во митологијата на владејачката династија Ким. Ким Јонг-ун често е снимен како јава коњ за да ја покаже својата лична сила и херојство како „врховен водач“.