Во Кривичниот суд Скопје денес продолжува судскиот предмет „Титаник”.
Минатото рочиште за овој предмет се одложи заради отсуство на обвинетиот Кирил Божиновски. Случајот е во фаза на презентација на сведоци, а на денешното рочиште се сослушуваат повеќе сведоци.
Како прв сведок сведочи Даниела Груевска. Таа во својот исказ истакна дека не донирала 1.000 евра за ВМРО-ДПМНЕ.
“Иако не донирав никакви пари за партијата, бев на листата на донатори во 2011 година 05/03/2020”, сведочеше Груевска.
Во 2011 година Даниела Груевска се нашла на листата на донатори на ВМРО-ДПМНЕ, наводно дека уплатила 60.000 денари.
“Тој период бев невработена и никогаш за никого не донирав пари”, истакна Груевска.
На прашањето од обвинителката Лиле Стефанова, дали во 2011 година имала уплатено пари како донација на некоја политичка партија, Груевска одговори:
“Не сум уплатила никакви пари ниту на друго лице сум му дала пари за да уплати во мое име донација за партија”, рече Груевска.
Во сведочењето таа истакна дека е на листата на донатори кога од СЈО добила покана да сведочи.
Груевска посочи дека била вработена во 2015 година во основно училиште.
Предметот се наоѓа во доказна постапка и го води судијата Осман Шабани.
Освен поранешниот премиер Никола Груевски кој е во бегство, во „Титаник“ обвинети се и Кирил Божиновски, Миле Јанакиески, Гордана Јанкулоска, Билјана Бришкоска Бошковски, Илија Димовски, Мунир Пепиќ, Едмонд Темелко, Кирил Тодоровски и други.
Тие се осомничени за злосторничко здружување, повреда на избирачкото право, повреда на слободата на определување на избирачите, поткуп при избори и гласање, уништување изборен материјал и злоупотреба на средства за финансирање изборна кампања.
И.Р