Еврокомесарот Јоханес Хан, кој престојува во посета на Македонија, доцна синоќа се сретна со делегација на ВМРО-ДПМНЕ предводена од претседателот на партијата Никола Груевски.

На средбата станало збор за организирањето и резултатите од изборите, постизборниот период и обидите за создавање коалиција, како и за зрелоста на ситуацијата за нови парламентарни избори, коишто би се организирале заедно со локалните.

Соговорниците разговарале и за Законот за употреба на јазиците, Специјалното јавно обвинителство, платформата на албанските партии и ризиците од користењето на оваа платформа како начин за репреговарање на Охридскиот рамковен договор, како и за плановите и целите доколку ВМРО-ДПМНЕ формира влада, вклучувајќи ги и реформите, воспоставената практика за коалицирање во Македонија по принципот победник со победник, предностите и слабостите на широките коалиции и искуствата на Македонија со вакви коалиции.

Директорот на Центарот за комуникации на ВМРО-ДПМНЕ Иво Котевски вели дека ја искористиле можноста во детали да го запознаат еврокомесарот со случувањата и да ги аргументираат нивната политика и одлуки. ВМРО-ДПМНЕ, како што посочува Костески, ги презентирала своите позиции во однос на сите прашања користејќи ги аргументите, коишто во последните неколку недели ги презентирала и пред јавноста.

– Комесарот Хан ги изнесе своите размислувања, кои се идентични со неговите јавно искажани ставови на вчерашаната прес-конференција, како и низ формата на препораките што претходно беа испраќани преку прес-конференциите на портпаролите на ЕУ, при што беше нагласено дека ЕУ не сака да се меша во тоа кој со кого ќе коалицира и какви одлуки ќе донесат македонските партии во однос на креирањето колиција и влада, изјави Котевски.

ВМРО-ДПМНЕ, како што посочува Котески, е партија чија што платформа и стратегија е зачленување на Република Македонија во ЕУ.

На средбата присуствувале и Никола Попоски, Никола Тодоров, Влатко Ѓорчев, Илија Димовски и Александар Николовски.