Нов случај на фемицид се случил во Сараево, каде маж ја убил својата поранешна партнерка, а причина за тоа злосторство е расправија за старателството врз малолетно дете, потврдија денеска локалната полиција и адвокатот на убиецот.
Маж идентификуван како Анел Беќировиќ (34) вчера во стан во населбата Алипашино поле во Сараево пукал во Емира Маслан (31) со која претходно бил во вонбрачна врска.
Убиството го извршил пред нивното заедничко дете, момче кое има само четири години, а потоа го киднапирал и го однел во стан во друг дел од градот каде што живеел.
Таму го пронашле полицајци кои по преговори успеале прво да го ослободат момчето, а потоа да го уапсат убиецот.
Веќе осудуван за семејно насилство
Во вторникот од полицијата изјавија дека се утврдуваат околностите на ова дело, но адвокатот Омар Мехмедбашиќ потврди дека неговиот клиент е лице кое е веќе осудено за семејно насилство, а постапката против него за злоупотреба на дрога е во тек.
Беќировиќ во април годинава бил осуден на три месеци затвор за семејно насилство.
„Детето било сведок на чинот на убиството“, изјавил Мехмедбашиќ за порталот „Кликс“.
Властите не презеле ништо за да спречат нови фемициди
Слично брутално убиство се случи во Босна и Херцеговина во август во Градачац, кога Нермин Сулејмановиќ ја уби Низама Хеќимовиќ, исто така поранешна партнерка, а тоа го направи и пред очите на детето, додека во живо го пренесуваше злосторството на социјална мрежа.
После тоа, во БиХ беа организирани низа протести, чии учесници бараа да се суди за да се спречат ваквите убиства со воведување драстични казни, меѓу кои и посебната квалификација на кривичното дело фемицид.
Досега властите не презеле никакви чекори за да се обидат да спречат повторување на слични случаи.